Yaado ka high speed quota

Quarantine times mein jaldi aankh khul gayi,
Koi aur Jaga na tha to purani yaadon ki almari khul gayi,

Socha purani love story revise Kar leti hoon,
Roj to tumko yaad Karti hi hoon,
Thoda aur Yaad Kar leti hoon

Yaadon ki speed bhi jyada thi,kuch hi palo mein tumhare sath gujre lamho ki chavi aankhon ke aage se ghoom gayi,

Na koi pooorna viram,na koi alp viram

Bas tum aur tumhare sath beete pal

Mein tumhare sath ki achchi yaadein hi Yaad Karna chahti hoon,
Per dard Kam nhi hua hai abhi,
To wo Kuch  din bhi Yaad Kar leti hoon
Jab yuhi chale Gaye the,
Ek Baar peeche mud Kar bhi nhi Dekha tha,
Na aakhiri dua salaam
Na gale lagaya tha,

Tum to chale Gaye per tumharo yaadein nahi gayi
Koshish ki kuch jalane ki kuch bahane ki
Kuch ek potli mein band karke bhijwayi bhi thi
Mili hogi tumhe daak se,

Pata badi mushkilo se kuch purani emails se nikala tha

Bhijwaya to sab tha
Per phir bhi un lamho ki tasveero ka mein kuch nahi kar payi,
Jo yuhi aankhon mein bas gayi
Sab kuch dhundla hota hai jab,
Tab bhi wo saaf dikhayi dete hai
Tumhe shayad kuch yaad nhi hoga
Phir tum to nayi yaadein bana rahe ho ab

Tum kya karte honge aajkal,
Kaise ho tum,
Jaanti hoon koi jawab Nahi milega
Phir bhi khud se ye sawal Kar leti hoon

Kabhi Kabhi dar Lagta hai,

Sochti hoon tum theek to ho na

Aksar bimar rehte the,

Wo khayal to rakhti hogi tumhara,
Tum bas har haal mein Khush raho,
Jitne aasoon meri aankhon mein hai,
Itni khushiya tumhe mile
Ye dua aksar Kar leti hoon

Yakeen Mano,
Dua kubul hui to bahut Khush rahoge,
Kyunki aasoono ki Kami nhi
Bas aankhon mein hi Rok leti hoon

Chalo aaj ki yaadon ka high speed wala quota khatam hua,
Ab poore din tum dheere dheere meri yaadon mein ana
Kabhi chai banate hue,
To kabhi khichdi,

Kyunki kuch aur yaadein to nahi hai mere paas
Tum nahi bas tumhari yaadein

Tumko yaad karti hoon to
Aaj bhi romantic ho jaati hoon
Sare mast mast gaane background mein bajne lagte hai

Tumko ye padh kar lagega mein pagal ho gayi hoon
🙂 Daro mat , kagar per to pahuch jaati hoon aksar
Per phir rok leti hoon khud ko,
Sambhal leti hoon khud ko
Tum jo nahi ho sambhalne ko mujhko